2Ti 4 | BEF | STEP | Nani Hu'mamofihi bulo to Yesu Kilisito ai hiti minoto bona'i lubu hiti nohuta'a fili'ahana'a asaga'i ka foya lito guna molo letalina bo ai bulo ya'ma Yesu kaba huse'i to kapo'a hiti huto hilina nehetito kaba hu letalina'mu yabe luto ya'ma luto kaga lu moloto huto kelepilugi kehelibo.

2 Timothy 4

1 Nani Hu'mamofihi bulo to Yesu Kilisito ai hiti minoto bona'i lubu hiti nohuta'a fili'ahana'a asaga'i ka foya lito guna molo letalina bo ai bulo ya'ma Yesu kaba huse'i to kapo'a hiti huto hilina nehetito kaba hu letalina'mu yabe luto ya'ma luto kaga lu moloto huto kelepilugi kehelibo. 2 Kai ya'ma mono ka lu yege hoto lu epilata ya'ma bona'i enali kumu kebesilina'a mekebesilina'a asaga kanagu sibigopa lu epibo. Enegekesa lito, sibina hilana'mu ka epekito enele'mo bati huto komopa'ani enele'mo babahi huto mono ka lu epiba epiba huto kosele'i mekehenogo enele'mo lehe talane. 3 Minomo tito minoto kana mone tupa nohinogo ya'ma mono'mofihi lamana'amu iyo iyo hite ka lilete he'milana'mu yabe. Ya nehite ka mone enegekesaguti kehelinogo laga'a hiti minalina ya'asigo kehelilune lite babafi bo enele'mo nupa hilenogo fa'mene sibi kaga'mu enumu fililina ka'a lu epilenogo kehelilabe. 4 Enali i behe hite, lusi mono kamofihi legeya'a ya'ma enemegesa hu emilete gusunupa'a meni'ina kilihe'i kagalo bite i hepilabe. 5 Enali ya hilanamoya kai ya'ma kana'amu kana'amu kekesa keheli bebe soto minobo. Keke luse nasana gupisalo notinogomo amuya moloto minobo. Ka lamana'a lu yege hose foya'a ya lito li gu ito ana ka lu epibo. Hu'mamofihi foya'a lilata bo kai ya'ma li su hoto libo.

6 Enali keye lite'ani suhi huto nani nugufaloti migufa'a nalune'mu habe. Nani ma meluguti he'miloto abiluna kana anasi tupa nohibe. 7 Nani ya'ma foya lamana'a lelito bu'ohube. Yokolo'na hololu lite ibe ligi abe ligi nehana ya suhi huto nani hololu luto foya limo buto maki'nilo nehetube. Ka lamana'amu kaba hu'ohunamofihi nasana mehe'mise huto li pili koto minomo buto nominobe. 8 To ya hugo ya'ma kokulumaguti be ligi'ohutamofihi mina sekele mamu'a hiti kakili'i lamana'a Sipi Bouba ya'ma hetofa nona'a guna malalina bo ai anana nimilibe. Minoto kana'a sipi yupahi Sipi Bouba ai'a le'mo bebe soto guna mololata bouba nani hiti silaga bona'i ai nehetilina kana'amu fifa ito geba hulata nohuta bona'i ya'ma ana kakili'i bi letalina'mu yabe.

Polu luga'amagihi ka lu epi su ho'ehina

9 Kai ma'asi nanitoga alube luto amuya moloto mele'isi alata'mu yabe. 10 Temasiu ai ya'ma melugu nasana'mu laga besigo keheligo tigo he'mi netoto Tesalonika metoga bu'ehinagi kai oletogo bati hu netalibe. Keleseniu ai Galesia metoga bu'ehina. To Taitasiu ai Talamesia metoga bu'ehina yabe. 11 Luku ai'asigo nanitoga minago moneka nohu'ibe. Makihi ya'ma le'moto moneko aliyo. Ai ya'ma foyagu nehe'menogo bati hilina'mu yagi yamofihi le'moto alane. 12 Tikikuhi ya'ma ho lufugo Efeso hepatoga nobibe. 13 Alube'mu nohutokamo ya'ma yasi koli bilata nohuna gu'i ya'ma Toloasi hepatoga Kapasihi ai nonugu sigito molo'ohunamo li netoto obo. To mono lataha'a buku'nimo hiti to pepa haya'a hiti mone molo'ohunamo hiti li netoto obo.

14 Kapaloti ana'ina lolo hulata bo, Alekasatau ya'ma laga mehina'a bo aku li sibina nimilata nohina ya'mu Sipi Bouba sibi nona'a legege huto emilube'mu hibe. 15 Ai'a kele'mo sibi sibi hu laligi kaba hu bati huto minobo. Ai luba huto amuya moloto lali mono kati'mu hega hoto keye lu'ehina.

16 To Yuta bona'magi nifisa i'ahana'mu ka foya nolugo yata'a hapi huto nani'i hapa'ni lu noepugo bona'i moneuba nele'mo bati huto nele'mo memolo'ehinamo ni'ibe. Yamofihi sibina'a ya'ma Hu'mau nona'a li epololata mehino. 17 Sipi Bouba mehi nimito nele'mo hetofa hu netoto ka lamana'a lu yege hoto lu epito lu su halane luto to fegutoga bona'magi keheli baga ilabe luto lufusa'ni amuya molo neto'ehina. To lubanamofihi bagaguti Sipi Bouba nubuto bito gulu ho neto'ehina yabe. 18 To Sipi Bouba ai'a ya'ma asaga nele'mo sibi sibi hilana'mu nele'mo bati huto kokuluma kapo'agu he'mi netalina'mu yabe. Ai fana meha'a ya'ma mino lito buto minalube'mu aitoga lofokehi lino. Lama'naka.

Ginaga fi epi'ehina ka'a

19 To ya'ma Pilisika to baha'a Akuila yagi to Onesifoluhi lalameha'a ya'ma keke'i lu noepolona nehafihe luto lu epibo. 20 Elasatu ai Koliti hepatoga mino'ehina to Tolofimu besilago Miletusi hepatoga he'mi eto'ohube. 21 Kai ya'ma ko ilina kana'a hupasi mehu'ehinogo alube luto amuya moloto obo.

Eubulu ai keke'i nolu ketoto nohapihe lu'ehina. To Puteni to Linu to Kolotia ana hite enali lalalutigi lugati hiti keke'i neli ketabe.

22 Sipi Bouba kaitoga meha'a hiti minalibe. To Hu'mamofitogati lehe'mose'na lenalitoga mino moloto mineno.